بقلم/الدكتورة فاطمة محمود
الفيل اللي في الأوضة the elephant in the room
دة تعبير أمريكي بيعبر عن المشكلة اللي محدش عايز يناقشها، رغم إنها ضخمة وواضحة وموجودة قدامنا، وخانقانا وهاتدمرنا في أي وقت، ولكن لإننا خايفين نواجهها، فبنتجاهلها وننكر وجودها، على أمل إنها هاتختفي لوحدها. بس الفيل اللي في الأوضة مابيختفيش لوحده لو تجاهلناه!
التعبير ده أدق وصف لحيلة دفاع نفسي بائسة المفروض نتعود نغيرها:
اعمل نفسك ميت... تجاهل/ تجاهلي انت بس وكل حاجة هاتتحل لوحدها.
لغاية ما حياتنا بقت مليانة أفيال!
جايلك عريس؟ اعملي عبيطة وتافهة وانكري عقليتك وشخصيتك علشان ما يهربش منك...
اتجوزتيه وطلع مدمن؟ وبيخونك؟ استهبلي واعملي نفسك مش عارفة...
بقى بيضربك؟ وبيدمرك نفسيا وجسديا؟ تجاهليه وعيشي حياتك عادي كإنه مش موجود...
الحل الأمثل عندنا: انكري مشاكلك واعملي نفسك مش شايفاها وهي هاتتحل من نفسها... العفريت مش هايشوفنا لو غطينا وشنا... الزبالة هاتختفي لو كنسناها تحت السجادة... الشمس هاتختفي لو غطينا عينينا... الفيل الضخم اللي بيدمر البيت هايختفي لوحده لو استهبلنا وتجاهلناه...
وتلاقي النصائح الغالية لأي حد بيطلب حل لمشكلة خطيرة:
التغافل ... التغافل أهم حاجة!
يعني لازم تتعلموا تتغفلوا... أوبس.. قصدي تتغافلوا (تدعوا الغفلة يعني) وتتجاهلوا (تدعوا الجهل يعني) وتستعبطوا وتستهبلوا (تدعوا العبط والهبل) علشان ما تضطروش تواجهوا الفيل اللي في الأوضة وتحلوا المشاكل لا سمح الله... أصل محدش عندنا بيحل مشاكل، بنكسل أو مبنعرفش... فبنكنسها تحت السجادة ونعمل نفسنا مش شايفينها... المهم منظرنا قدام الضيوف... مش مهم حقيقة وضعنا... المهم "نعيش"... بمعنى نتنفس وناكل ونشرب وننام ... مش مهم جودة العيشة دي شكلها إيه... أهي عيشة والسلام زي الكائنات وحيدة الخلية، هو احنا يعني أحسن منهم في إيه؟
ولو حد تجرأ وشاور على الفيل المقدس وتساءل بدهشة:
"إيه الفيل ده يا جماعة؟" 🐘
هايحصل حالة صدمة جماعية لإن "عيب" الكلام عن الفيل، واللي بيتكلم عن العفريت لازم يواجهه. فالناس هاترد عليه باستنكار واستغراب: "فيل؟ هو فين الفيل دة؟ مفيش فيل هنا، احنا زي الفل ومفيش عندنا أي أفيال ولا مشاكل ولا أي بروبليم...
الفيل اللي في الأوضة مش هايختفي إلا لو حد شاور عليه وقال للباقيين: إيه اللي جاب الفيل ده هنا يا جماعة؟ 🐘 عايزين نشوف طريقة نخرجه من الأوضة دي علشان نعرف نعيش صح!
يا ترى كام حد بيقرأ الكلام دة عامل نفسه مش شايف الفيل؟
تعليقات
إرسال تعليق