نصائح للشباب اللي على أعتاب التخرج

 

كتب - هانى زكريا 

1- أنت بيتقال عليك حديث تخرج بس لحد سن 27 يعني لو ملحقتش تكون خبرة في مجال معين وCV محترم متندمش لما العمر يعدي منك

2- بعد التخرج هتتعرض لصدمات من أهلك وأصحابك، الأنانية بتجري فى دم البشر، ومحدش بيحب يشوف حد أحسن منه، وأهلك اللى حاطط أملك عليهم مش هيجروا على حلمك بدالك 

.

3- لو أنت قاعد ف بيتكم، ومش لاقي شغل ومقضيها على القهوة، هتندم أشد الندم إنك مستغلتش الوقت ده فى إنك تتعلم English و Soft Skills وتنمي نفسك في المجال اللي بتحبه عن طريق الكورسات الأونلاين ببلاش علفكرة

4- أول ما هتخلص كلية مش هيتقال عليك طالب وبالتالي الـ CV بتاعك لو مكنش فيه أي خبرات أو تدريب أو أي شغل ولو بسيط  متلومش غير نفسك

 

5- الشغل مش عيب ولا حرام بس العيب إنك تقعد ف بيتكم وتضيع وقتك، وهتكتشف ده وأنت بتعمل Interview لما يقولك كنت بتشتغل إيه؟ إيه خبراتك السابقة؟ تفتكر أشغلك عندي ليه؟ ساعتها هتحط وشك في الأرض وتندم على عمرك اللى ضاع 

6- الشركات بتصفي شغلها، وبتمشي العمال، فالظروف اللى بتمر بيها البلد مش محتاجة واحد ناقل CV من على النت أنا بقولك أهو

7- الأنشطة التطوعية بتفيدك وبتضيف لمهاراتك وخبراتك الحياتية وهتعملك شبكة علاقات كويسة هتجبلك شغل بعدين، فمتفضلش عايش وحيد وتسأل أنا مش بتقدم خطوة ليه 

8- اللى بتعمله فى الخمس سنين دول هيرجعلك ف الخمس سنين الجايين، لو فاكر إنك اتخرجت يبقي ترتاح بقي وتضيع كام سنة، فتأكد من إنك بتتأخر أوووي وبتضيع عمرك 

9- لازم بعد التخرج تتعلم لغة واتنين، وتكون مثقف، عندك CV قوي، وشبكة علاقات قوية، وبتعرف إزاي تتكلم عن مهاراتك باحتراف وتسوق نفسك، الكورسات الأونلاين حلوة وببلاش

10- لو راضي عن حياتك بنسبة 100%، ومش بتفكر تضيف لنفسك حاجة جديدة اعرف إن عندك مشكلة 

11- في ناس بتشتغل من غير واسطة عادي جدًا..

12- الناس بتهتم بالنتيجة النهائية بغض النظر عن إنك تعبت أو لا .. فـ اشتغل بذكاء أكتر وجهد أقل

13- شئت أم أبيت .. أنت متوسط أكثر خمس أشخاص محيطين بيك، فـ اخترهم بعناية