كتب - هانى زكريا
المذيعة : لو جاتلك تذكرة سفر هدية اكتب البلد الذي تحب السفر إليه ... ولماذا ؟
شكري : والله الحقيقة و بكل صراحة أمام الله إن أنا بحلم بإني أرجع اروح الكعبة تاني و احج تاني ، دي عندي أمنية و اسأل الله أن يهديهاني فعلا السنة الجاية ان شاء الله .
المذيعة : شيك على بياض .. اكتب المبلغ و هتصرفه في إيه ؟
شكري : مليارات النقد العربي للبوسنة و الهرسك .
المذيعة : يوم في حياتك لن تنساه أبداً ؟
شكري : والله أيام كتير الحقيقة بس بردو أحب أدي حاجة يعني من حياتي الخاصة .. إن أنا يوم ما اتجوزت كان يوم بالنسبالي ليه مفعول السحر بالنسبالي... ليه ؟ لإني أنا قعدت كام سنة من غير ما اتجوز و طبعا مكنتش قديس مع الأسف يعني ف ماصدقت إن أنا حسيت حلاوة الحب الصادق الحب اللي هو بقى حب الزوجة و الحياة الطاهرة المطهرة .
المذيعة : لو قُدِر لك أن تعيش في الماضي .. مَن مِن الشخصيات التاريخية تختار و لماذا ؟
شكري : أصل أنا لو هقولك هقولك مين ولا مين يعني أقولك مين من أول الرسول عليه الصلاة و السلام و سيدنا "أبو بكر" و سيدنا "عمر" و سيدنا "علي بن ابي طالب" و "عثمان بن عفان" و الخلفاء الراشدين ولا أقولك شخصية "عمر بن عبد العزيز" و دي شخصية أنا قريت إنها بتتمثل حالياً و أنا أدعو للناس اللي بيعملوها إنهم يطلعوا "عمر بن عبدالعزيز" كما هو لأنه شخصية مضيئة ، مضيئة إلى اقصى حد و رجل كان ثري جداً قمة الثراء و الشفافية و الرفاهية و بعدين لبس الخيش ف دور عظيم....
المذيعة : لو قُدِر لك أن تعيش في الماضي مَن مِن الشخصيات التاريخية النسائية تختار و لماذا ؟
شكري : أقولك مين ولا مين و لا مين .. أقولك مثلاً مش عايز أطلب شخصيات يعنى فيها حرج إني اتكلم عنها بس أسيب اللي فيهم حرج بقى إنما يعني أقولك مثلا "أسماء بنت أبي بكر" اللي جالها ابنها يقولها أنا هأُهزَم ولما أُهزَم هيقطعوني .. تقوم تقوله وما يضير الشاة سلخها بعد ذبحها و تدفعه إلى القتال و هى تعلم إنه هيُقتَل و بعدين يُقتَل و فعلاً يمثّل بيه و يترفع مصلوب ٣ ايام و هى أم تروح و ما تبكيش .. تقف و تبص و تقول أما آن لهذا الفارس أن يترجّل ....
المذيعة : أستاذ شكري إحنا في نهاية لقائنا سعداء جداً بوجودك معانا و بالكلام اللي حضرتك قولتهولنا و دلوقتي بنسألك سؤالنا المعتاد .. الفنان شكرى سرحان .. من أنت ؟
شكري : أنا ابن الأرض العربية .. ابن مصر العربية .. أحد أمة لا إله إلا الله و هذا شرف كبير ليا و أدعو الله إن أنا أكون جدير بأن تُعطى لي و تطلق علي هذه المسميات اللي أنا قلتها.
تعليقات
إرسال تعليق