رأيي في الزواج عندما تكون الزوجة أكبر سنًا من الزوج/وطني نيوز

 

كتب / هانى زكريا

الزواج بيحتاج لنضج وثقافة ومعرفة بكيفية تكوين أسرة وتحمل المسؤولية ومهام لكل طرف مختلفة تمامًا عن الطرف الآخر ، زى مثلاً من الصفات الأساسية للرجل إنه يكون عاقل ناضج علشان يقدر يكون مُعلّم ومرشد ويقدر يحتوى الأسرة بالأمان ويكون علي استطاعه بإتخاذ القرارات الطارئة والسريعة وغيره كتير من الصفات ، كل الصفات دى مش مرتبطه بفئة عمرية معينه يعني ممكن نلاقي شاب 25 سنه وعنده كل الصفات دى وأكثر وممكن نلاقي شاب 40 سنه وغير ناضج ولم يستطيع تحمل أي مسؤولية ومعندهوش شخصية من الأساس يبقى الشاب اللي 25 سنه هو المؤهل للزواج واللي عنده 40 غير مؤهل تمامًا ،

طيب رأيي إيه لما تكون الزوجة أكبر منه سنًا ؟

انا قولت رأيي بس انت مش واخد بالك ، مش مهم السن أبدًا ، المهم الصفات اللي قولتها فوق دى تكون متوفره في الرجل مهما كان عمره كام ، عارف ليه ؟ علشان ممكن اللي عنده 40 سنه اتجوز بنت اصغر منه بعشر سنوات لكن هى بتفهم عنه وناضجه أكثر منه وده هيسبب خلل في العلاقة ، واللي عنده 25 اتجوز من اللي اكبر منه سنًا لكن هو قائدها ومعلّمها ومرشدها ومحتويها ،

يبقي السن ده مجرد رقم مش اكتر وملهوش أي علاقة بأي صفات لازم تكون متوفره في الرجل ،

لو بصينا علي حياة سيدنا النبي صل الله عليه وسلم هنلاقيه تزوّج من الأكبر منه سنًا وتزوّج من الأرملة والمطلقة وتزوج ممّن لم يسبق لها الزواج ، ومن ضمن الأسباب لزواجه من الحالات دى كلها علشان ميحصلش خلاف وتضارب في التفكير لما يجي الشاب يتجوز من إمرأة حالتها الإجتماعية مختلفه عنه ونقتدى بالرسول ،

وبرغم كده برضو بيحصل تضارب وكتير من الناس بيخافوا يتجوزوا من أرملة او مطلقه او الأكبر منه سنًا ! المشكلة إننا بنتناقش في بديهيات وكل حاجه واضحة وصريحه بس احنا اللي بعيد شوية عن الدين والعقل ،

دمتم بخير ...