الصداقة قيمة مهمة في كل العلاقات القريبة ( الجزء الثالث ) / وطنى نيوز

 

بقلم : بسمة أحمد عبد الرؤوف

 

◇ واجباتك تجاه صداقتك بالطرف الآخر :

لبناء علاقة صداقة قوية مع شريك الحياة أو بين الأب والأم وأولادهم..

أو عامة لما تريد تعمق علاقتك بشخص وتجعله من أقرب الأقربين ليك مهم تتعلم تحقق ٣ أساسيات في علاقتك بيه ..

وهم قد أوضحهم أستاذنا مصطفي حسني في حلقة ( ثمن الصداقة ) ..

وأول أساس منهم هو كالآتي :

☆ ١- الموافقة لتدوم المرافقة :

فالعلاقة الصح مش اللي بتبقي مليانة بالخناقات علطول وفي كل حاجة وعلي أبسط حاجة ..

لكن هي اللي فيها (الموافقة ) ..

اللي فيها سهولة وبساطة في التعامل مابينكم ..

فمثلا لما بتكون بتدافع عن مبادئك ومعتقداتك ليك حق إنك تختلف مع التاني ..

لكن مش ينقلب إختلافكم لحرب بينكم ..

والعلاقة الصح هي اللي كل طرف فيها بيسمح للتاني إنه يتكلم عن أفكاره ووجهات نظره .. وكل دي حاجات فيها طابع شخصيته وحريته في تعبيره عن نفسه .. لأننا طبيعي مختلفين عن بعض مهما وجدت التشابهات الكتيرة .. ولأن الإختلاف ده بيميز كل واحد فينا

قال تعالي { ولا يزالون مختلفين إلا من رحم ربك ولذلك خلقهم } ..

فهنا بتكون الإختلافات مابينكم ..

لكن هتاكلوا فين وهتشربوا فين وهتخرجوا سوا فين خلي فيها الموافقة بينكم مش كل حاجة يبقي فيها خناقات وخلافات وعلي أمور بسيطة زي دي ..

لأن الإختلافات المستمرة علي الأمور البسيطة دي هتحول العلاقة من علاقة مريحة إلي علاقة مرهقة أو مؤذية أحياناً كمان .

والموافقة كمان مش معناها إننا نبقي منافقين ..

لكن حد فيهم بيقترح إقتراح مثلا والتاني يقوله موافق أنا معاك .. عشان هو مستمتع بصحبته وبيستمتع بوقته معاه ..

مش محتاج إنه في كل حاجة يعارض فيها ويتخانق .

قال صلي الله عليه وسلم :

[ المؤمن هين لين سهل ]

والنبي عليه الصلاة والسلام كان عنده تمام الموافقة في الحق طبعا ..

والصحابة بيقولوا علي سيدنا النبي عليه الصلاة والسلام : [ كنا نجلس مع رسول الله نتكلم في الدنيا فيتكلم معنا ، ثم نتحدث عن الآخرة فيتحدث معنا ، فإذا تكلمنا في الطعام تكلم معنا ، وربما تكلمنا عن أمور الجاهلية وهو يستمع وربما ابتسم ]

الموافقة دي بتخلي الصديق بيحب صحبة صديقه وبيشتاقله وبيستمتع بوقته معاه وبيرتاح معاه وبيبقي المستراح بتاعه مش يكون هو جزء إضافي من معارك الحياة اللي عليه وعبء عليه كمان .

¤ وهفكركم بكلمات أغنية جميلة وراقية جدا للمنشد ماهر زين في مفهوم الموافقة ده بيقول فيها :

( أيوة فيكم مننا ..نفس روحنا و دمنا ..قلبنا بيرتاح أوام للي فعلًا زيّنا ..الكلام نفس الكلام ..حتى نفس الإهتمام..عِشْرة مش ممكن تهون..يوم من الأيام..حتى لونّا و شكلنا .. يعني أنا شبهك تمام..و بتجمعنا حاجات حلوة أكيد..يلّا نمد الإيد من غير كلام..أجمل الأوقات بتيجي عالبال..يبقى الحِمل جبال ننساه أوام..إنت وأنا )

فبقول لكل اللي يريد يبني علاقة قوية مع أقرب الأقربين ليه ..

إنه يستنبط الأساس الجميل ده من علاقات الصداقة ويطبقه في علاقاته القريبة منه ليبني علاقات مريحة وصحية ..

ويزود الروابط في علاقاته لتكون أقوي وأجمل.

ونكمل الباقي في الأجزاء الجاية من المقال بإذن الله