الصداقة قيمة مهمة في كل العلاقات القريبة ( الجزء الأول ) / وطنى نيوز

 

بقلم : بسمة أحمد عبد الرؤوف

 

☆ قبل ماتقرب بمشاعر الحب الحقيقي لحد ..

اتأكد من إنك تقدر تمنحه حاجتين مهمين جدا

وهما :

١- الدعم المستمر بكل أنواعه وخاصة وقت الأزمات

٢- أن تكون حاضر في حياة من تحب ..

وأن الشخص القريب منك أو اللي بتعتبره قريب منك أول مايحتاجك يلاقيك .

لدرجة أن فيه جملة جميلة في أغنية بتقول ( مهم جدا وجودك في تفاصيلي )

عشان كده لو عاوز تخلي علاقة معينة في دايرة أقرب الأقربين في علاقاتك .. خاصة في العلاقات العاطفية ..

يبقي مهم تتعلم الأول الحاجتين المهمين دول أو تتأكد من أنهم موجودين عندك ..

ولو ماتعرفش تمنحهم يبقي بلاش تقربله أو ع الأقل تنتظر لغاية ماتتعلمهم ..

¤ بقول كده ليه ؟!

لأنه اللي قال عبارة ( الصديق وقت الضيق ) .. ماقالهاش من فراغ ولكنه كان عنده حق جدا جدا ..

ولأن الخذلان المستمر دلوقتي في العلاقات بئا منتشر كتير جدا .. فمهم إننا نختار صح .. ونختار القريبين مننا بعناية شديدة ..

ولأن الصداقة قيمة جميلة وراقية فهي ممكن تدخل حالياً في كل أنواع العلاقات الإنسانية تقريباً ..

وهي بتقوي روابط العلاقات أكتر وأكتر ..

لأن العلاقة بتقوي كل ماكان فيها أكتر من رابطة مش رابطة واحدة بس زي لو نفس الشخص كان أخ أو قريب وصديق مثلا او صديقة وكمان زميلة في الشغل مثلا

● واتعلمت معني قوة العلاقة بكثرة روابطها من قصة الحكيم اللي أعطي لأبنائه حزمة عصيان يكسروها ماقدروش طبعا .. ولما فكها وأعطي كل واحد منهم عصاية واحدة منها بس .. قدروا يكسروها ساعتها .

■ عشان كده بنلاقي الإتنين المتجوزين أو المخطوبين بيوصوهم بالصداقة مع شريك الحياة وأنها هي الحاجة اللي هتقوي علاقتهم وتجملها أكتر .. ونلاقي نصايح وخطوات كتيرة يعملوها عشان يبنوا علاقة الصداقة مابينهم ..

وكمان الآباء والأمهات بيوصوهم يصاحبوا أبنائهم في التربية الناجحة .. وكمان الأولاد بيوصوهم يصاحبوا والديهم ..

كمان علاقة الصداقة ممكن نبنيها بين الأخوات ..

أو ممكن بين إتنين قرايب أو جيران مثلا أو أياً كانت العلاقة اللي نحب نبني الصداقة فيها ..

وفي حالات غير المحارم طبعا مش بقصد صداقة الرجل مع المرأة الغير محارم ..

ولكن بأقصد فيها طبعا صداقة الراجل للراجل والست للست .

♡ ولأن الصداقة بتجمل العلاقات وبتحسنها أكتر وأكتر ..

فأنا لاقياها قيمة عليا سامية متداخلة جوه كتير من العلاقات الإنسانية مش علاقات الصحاب المعروفة او أصدقاء الدراسة وبس ..

عشان كده مهم إننا نتعلم أساسيات الصداقة الصح .. ( الصداقة الحقيقية ) .. ونطبقها في باقي علاقاتنا ودوايرنا القريبة مننا ..

وعشان نتصرف صح زي الصداقة الحقيقية اللي بتبقي بين الصحاب ونطبقها صح في باقي العلاقات زي لو كنت مثلا شريك حياة أو اب أو أم أو أيا كان نوع العلاقة ..

ممكن نتخيل كده ..

لو أنا كنت صديق مقرب لحد كنت هتصرف إزاي في الموقف ده ؟! ..

وأحط نفسي مكانه ..

وأعمل زي أي صديق مقرب ليه من أصدقائه وأعمل إسقاط علي نفسي وأبقي شخص صديق ليه زيهم ..

أو أتعلم كمان من قصص الصداقات الحقيقية الرائعة وأقرأ وأسمع عنهم وأبدأ أأقلدهم .

عشان كده تعالوا نتعلم نبني الصداقة الحقيقية في علاقاتنا القريبة ..

نتعلم صح .. ونبنيها صح ..

عشان مانكونش سبب في وجع القريبين مننا ..

وعشان مانوجعش أقرب الناس لينا بجروح عميقة تأثر عليهم جدا وصعب ينسوها بسهولة ..

نتيجة إن إحنا مش متحملين مسئولية قربهم مننا .. أوماعرفناش نكون قد علاقتنا بيهم ..

أو مش دافعين تمن الصداقة ..

وده اللي هنقوله في الجزء التاني والأجزاء اللي جاية من المقال إن شاء الله .