بقلم // طلعت حلمى عامر
من غير تجريح
أنا تاجر من غير ولا تصريح
بسرح بالشنطة وبأونطه
وكلامى كتير فيه ألابانده
تلاقينى ببيع وسط محطه
جلدة أنابيب او جوزة الطيب
وساعات شرابات او بنطلونات
مايوهات بديهات
أو حتى ببيع حمص وزبيب
أنا واد سريح لكن لقطه
وأخاف وأتكهرب م الشرطه
قربى يا مدام فيه ليف حمام
و معايا كمان دستة أقلام
تنفع لحمادة وكالعاده
خدى منى كمان دستة زياده
و معايا كمان للحبيبه
ورد وياسمين جوه زكيبه
سديهات لحليم سديهات افلام
وتذاكر لأفلام السيما
و معايا كمان جوه الشنطه
جاتوهات تتباع لو بالخارطه
و معايا كمان حبة سلطة
لو عايزه كمان عندى بدنجان
اسماك ولحوم ، صلصة رمان
اصل أنا سريح لكن فنان
ويبيع الحرف لأى زبون
وبدون عربون اصل انا غلبان
وألاتى ساعات وليلاتى ببات
وسط الأوراق وارسم قطه
وساعات الحرف بيتغطى
فأرجع وابيع وسط محطه
سريح وبضاعتى كلام فى كلام
وكلامى يا ناس كله اونطه
©©©©©©©©
تعليقات
إرسال تعليق