تعرف على حكاية “شجرة الزمالك” المشهوره فى حى الزمالك

 

تعرف على حكاية “شجرة الزمالك” المشهوره فى حى الزمالك

كتب- هانى زكريا 

في حي “الزمالك”القريب من برج القاهرة، هتلاقوا شجرة ضخمة، كل فرع فيها أقرب لشجرة مستقلة بذاتها، والجميل في شكلها كمان إن فروعها لفت على بعضها، وبقت جدايل ليها هيبة وجمال، وكإنها مرسومة.. أكيد عرفتوها.. بنتكلم عن شجرة الزمالك الشهيرة، تعالوا بينا نعرف حكايتها.

من أكتر من 150 سنة تقريبًا، وتحديدًا سنة 1868م أصدر الخديوي إسماعيل قرار بجلب مجموعة من أشجار “الفيكس البنجالنس” أو “التين البنغالي” من الهند، علشان تتزرع في مناطق مختلفة في القاهرة والجيزة، وكان الهدف هو تزيين شوارع القاهرة وظهورها بمظهر جمالي وحضاري، وللأسف مع الزمن بقت “شجرة الزمالك” آخر شجرة من المجموعة دي، ويمكن من هنا جت شهرتها. مع الوقت بقى فيه زوار ومعجبين وكمان أصدقاء للشجرة، ومش بس مصريين، ده كمان في سياح بييجوا ليها مخصوص، ومنهم اللي بييجي يتصور معاها، ومنهم اللي بييجي يسجل ذكرياته عليها، ويمكن بسبب شهرتها بقت مكان مثالي ورائع للقطات فرحة عرسان جداد، أو لوكيشن لفوتو سيشن لمصممين الأزياء.