كتب : هانى زكريا
البدايه بدأت لما راح عند الجزماتى يشترى جزمة . الراجل طلبله فنجان قهوة . بيشرب القهوة ومسك الفنجان بايده لقي ايده بتتهز ،، مسك نفسه .. الهزة زادت أوى والقهوة اندلقت ع هدومه .
بالصدفة كان فيه دكتور معدى . كشف عليه .. قالهم يا جماعة .. الفنان جاله شلل نصفى .. المرض محزن أه جدا .. بس المحزن أكتر هو التجاهل .. محدش سأل فيه خالص لدرجة انه اضطر يكتب مذكرة للدولة تعالجه على نفقة الدولة وهتلاقى صورة ليه ساند على العكاز .. كان مستنى يصرف العلاج
نادرا لما حد كان بيزوره من الوسط الفنى .. محدش كان بيسأل عليه فعلآ وحرفيآ .. الرئيس السادات صرفله معاش استثنائى كان بيصرف منه .. وفضل يعانى من الشلل 15 سنة .. بالظبط 15 سنة .. لحد ما ملامح وشه اتغيرت تمامآ .. هو معمر ما شاء الله عاش 89 سنة
ما قبل النهاية إنه في مرة حن للمسرح والناس .. خد بعضه وراح مسرح الريحانى هو بدايته كانت فى مسرح الريحانى .. وقف قدام شباك التذاكر يفتكر الشاب الصغير اللي كان بيقول مونولجات تهيج الناس ضد الانجليز في ثورة 19 .. لما كان لسه 21 سنة .. ويبص عالعكاز فى ايده .. عرف ان العمر عدى وجرى .. فقعد يبكى ويبكى .. لحد ما الناس خدت بالها منه وروحته بيته
النهاية المؤلمة في اسبوع وفاته .. جاله هبوط عام ودخل المستشفى.. توفى الفنان الراحل حسن فايق يوم 14 سبتمبر عام 1980 .
رحمه الله العلى القدير واسكنه فسيح جناته
تعليقات
إرسال تعليق