بقلم /نادين العزومي
بتحبيه؟
كُنت..
وايه اللي غير الحال؟
بقيت.. بخاف
عليه؟
لا، منه
ازاي؟
بقيت اخاف يغدر بي..
إيه دا؟ مين حضرتك وازاي واخد راحتك وكأنك تعرفني من سنين!!
_اهدي يا انسه انا مش كأني،انا اعرفك من سنين فعلاً.
نعم!،ازاي؟..ومنين
اعتقد ملهوش لازمه الكلام دا.
لا معلش ليه، ولازم تفهمني دلوقتي حالاً معنى اللي قولته دا.
حاضر اسمعيني، وبراحة،
انا شغال في الكافيه اللي ورانا دا
اتوظفت من سنة بالظبط تقريباً، ومن ساعة ما اشتغلت هنا وانتي كل يوم الساعه 5 تيجي وتقعدي على البحر هنا على نفس الكرسي ونفس القعدة والبصة متغيروش من يومها، وكنت بحاول اعرف عنك اي حاجه وايه قصتك بس مكنتش بعرف، كل اللي عرفته انك بتحبيه اوي..
هو مين دا اللي بحبه اوي؟!
متفهميش غلط، انا اقصد البحر.
اه دي حقيقة، اتفضل كمل.
بس ومن ساعتها وأنا عارفك ومتابعك .. ومصدقت النهارده ملقتش ناس كتيره موجوده واإتنهزت فرصة اجي اكلمك، ولو سمحتي، متزعقيش أو تتنرفزي انا بس حابب أعرف ايه قصتك.
_لا دي قلبت جنان خالص، عن اذنك الموضوع مبقاش مُحتمل.
وجريت في طريقي لـ بيتنا ومدتهوش حتى فرصة يرد عليا او يكمل شرح لكلامه.. منكرش ان في اسئلة واستفسارات كتيره اوي في دماغي ومش لقيالها حل وبصراحه مش عايزه لها حل، كل اللي في دماغي اني كرهته من قبل ما اتكلم معاه كرهته عشان فكرني بأكتر حاجه وجعتني ولسه بتوجعني ولسه ملقتش ليها حلول، عادي يعني وانا من امتى عرفت اجاوب على حاجه في حياتي.
دخلت بيتنا وبحاول اخبي ملامح وشي اللي مش مفهومه وزعلي الدايم بقاله سنه.. مش حابة ازعلهم في البيت انا بنتهم الوحيده ومحدش هيحب يشوفني كدا، مسحت ع وشي وخدت نفس وفتحت باب الشقة، وبمجرد ما فتحت كالعاده سمعت الصوت اللي بيردلي روحي مهما كان فيه مشاكل كتيره.
والدتي: دينا حبيبتي حمدلله على السلامة، اتأخرتي يا بنتي النهارده.
الله يسلمك يا قمر، معلش بقا،اومال فين بابا.
اتصل بيا من دقيقه كدا وقالي انه هيتأخر شويه النهارده.
اهه طيب ماشي
ياريت يا ماما تحطيلي اكُل احسن انا هموت من الجوع.
عيوني ليكي.
_تسلم عينك يا قمرر انت.
بوستها وحضنتها ودخلت اوضتي ورنيت على بنت خالتي، دي اقرب شخص ليا.. وحكيتلها على كل حاجه.
طب انتي غبيه ولا مالك؟
ليه مشيتي وسبتيه كدا، من غير حتى ما تفهمي حاجه تانيه.
ميار لو سمحتي انا مش ناقصة، انا مكنتش مستحمله نفسي عشان استحمله.
انا غلطانه اصلا، إمشي بقي، عشان مش فضيالك.
بقت كدا؟؟
اه بقت كدا..معلش بقا مقدرش اسيب زوجي قرة عيني لوحده.
_اه وبكره تقوليلي اولادي كل حياتي،يارب صبرني،سلام.
باي،
قفلت وبصراحه ضحكت وفرحت، يمكن محصلش موقف يستدعى فرحتي دي، بس مفيش غيرها بيهون عليا زعلي او خنقتي.
شغلت اغنيه هاديه. وفتحت شباكي اللي كان باين فيه القمر والنجوم، وريحه النسيم اللي مفيش زيها.. وبدأت اسرح في انغامها وافتكر ذكريات، واقرر امحي ذكريات، واقرر قرارات مش هعمل بيها اصلا.. بس معلش بقا.
قطع الاغنيه واندماجي معاها صوت ماسدج..
من رقم غريب مكتوب فيها بالنص
عشانك انا قادر اكمل، عشانك قادر اتحمل، وكل مره بشوفك.. بحبك تاني من الاول"
ايه؟ مين دا؟ لا صورة باينه ولا اسم ظاهر.. وانا مش مخطوبه ولا حتى مرتبطه ولا حد معاه رقمي.
لا انا مش ناقصة فعلا، انا ناقصة كركبة في حياتي دي؟ كل ما ارتب حاجه تطلع حاجه تبوظها؟
خلاص وهريح دماغي و هعمل بلوك للرقم واطلع اقعد معاهم برا، هنسى ومش هفكر في اي حاجه.
اممم.. هحاول يعني.
بعتذر على قُصر الحلقة بس دا لسه في الاول.
تحفه يا نادين استمري💓وعايزة اعرف باقي القصه
ردحذف