تعرف علي تفاصيل الحوار الذي دار بين الفنان عبدالله غيث أنطوني كوين اثناء تصوير فيلم الرسالة / وطنى نيوز

كتبت / إكرام بركات..

 

أُجري حوارمع المرحوم الفنان عبدالله غيث عن كواليس فيلم الرسالة مع الفنان العالمي أنطوني كوين قال واحنا بنصور الرسالة كانوا بيصوروا الأجنبي الأول وبعد ذلك يدخل العرب يمثلوا بعدهم قولت جميل ، نري أنطوني كوين بيمثل ازاي وأنا ممثل كويس هعرف أقلده وإذا قدرت أضيف من عندي هضيف.

- يوم التصوير أنطوني كوين فاجئني مفاجأة مذهلة وطلبني عنده .. قالي أنا ليا عندك رجاء قولتله أنت تؤمر، قالّي ممكن تمثل أنت الأول عشان أتعلم منك كيف يكون الإنسان العربي ازاي بيشاور ازاي بيتكلم وبيمشي ازاي، وقالي أنه شاف الممثلين الإنجليز بيمثلوا ازاي كأنهم في مسرحية لشكسبير ومش مقتنع بيهم .. أنا عاوز أبقى عربي 100% فأرجوك تمثل أنت قبلي شوف عظمة الفنانين الكبار.

- بقيت سامع قلبي وهو بيدق أنا كنت عايز أقلده دلوقتي أنا الأول .. قريت افاتحة 100 مرة ووقت ما استدعوني للتصوير ماعرفش أيه السكينة اللي نزلت عليا بقول إنها فيض من ربنا .. يلا ياد يا عبدالله اتوكل على الله وحمزة بتاعك والإسلام بتاعك وتاريخ محمد رسول الله بتاعك، وطلعت على مشهد الحشرة اللي بتاكل وثيقة قريش لقيت أقدامي ثابتة زي الحديد وروحت ناتع المشهد كله من أول مرة، وإذا للجماهير الحاضرة من مغاربة وسوريين ومصريين يهللوا بـــ "الله أكبر".

- هنا أنطوني كوين أُخذ والخوف اللي كان عندي انتقل ليه كان شايفني قبل التصوير عبدالله غيث عادي لابس شبشب وماشي عادي مش هو ده اللي هينافسني يعني، بعد المشهد ده أي حد أجنبي كنت بفوت عليه بيرفعلي الطاقية ويقولي "هالوو سير"، وجه أنطوني كوين يعمل المشهد اللي مثلته غلط فيه 3 مرات.

- فات اليوم وروحت أسأله أيه رأيك فيا قالي "أنت أيه رأيك فيا أنا؟" .. قولتله أنت أنطوني كوين مش محتاج أقول رأيي فيك، معجبوش الرد وكان عايزني أقعد وأنقده لدرجة إن فيه مؤتمر صحفي سألوه عن رأيه فيا قالهم عبد الله غيث ممثل عظيم وأحمد ربنا إنه مش بيعرف يمثل إنجليزي وإلّا كان هيبقى خطر عليا في السينما العالمية