بقلم/ الشاعر طلعت حلمى عامر - طنطا
كل عين تعشق حليوه
كل عين تعشق حليوه وانتِ حلوه فى كل عين
يا حبيبتى قلبى عاشق واسمحيلي بكلمتين
كلمتين يامصر يمكن
هما اخر كلمتين
حد عارف لو يخالف
يبقى شايف نفسه فين
نفسى اوصلك ياغاليه وابدر الافراح فى ارضك
واشتكيلك م البساريا سرقوا خيرك نهشوا عرضك
بالوساطه والبلاطه سرقوا 100 مليون سباطه من جناينك
والخلاصه بالغلاسه ضربوا كل ايدين حبايبك
كلمتين يا مصر يمكن
هما اخر كلمتين
حد عارف لو يخالف
يبقى شايف نفسه فين
نفسى اسمع مره صوتك او سكوتك يبقى زار
ليه بلاقى بس سوطك اعلى من صوت المرار
كان منايا اعيش جحودك بس يطلع له نهار
بالهزار اوبالمحبه حبه حبه خفى حملك عل الحمار
كلمتين يامصر يمكن
هما اخر كلمتين
حد عارف لو يخالف
يبقى شايف نفسه فين
صدقيهم لو قالولك ان حبك فى الضلوع
وان بصبر مهما اصبر بس صبرى مهوش خنوع
وان صوت الحق اقوى لو هيطلع وسط جوع
حبى ليكى سيف حاميكى مش تذلل او خضوع
كلمتين يامصر يمكن
هما اخر كلمتين
حد عارف لو يخالف
يبقى شايف نفسه فين
بالكفوف نرفع الوف وسط جوف المستحيل
والحروف لو فيها خوف تختفى من جيل لجيل
لو هنقتل كل صوت مين هيصبح يوم دليل
احنا مش حبة عواله احنا خطوه فى وسط ميل
كلمتين يا مصر يمكن
هما اخر كلمتين
حد عارف لو يخالف
يبقى شايف نفسه فين
يا أميره ليه الخميره تروح لغيرناوخيرنا ليهم ع المشاع
واحنا جيره وهما عيره.. هما حبه من الضباع
احنا قلب وكله حيره بنعشقك بس خايفين م الضياع
ماشيه ليه بنفس الوتيره والنجيله سارحه رغم الاتساع
كلمتين يامصر يمكن
هما اخر كلمتين
حد عارف لو يخالف
يبقى شايف نفسه فين
والبراءه فى الجرائه حلم لو يصبح أكيد
والضمير لو يبقى صاحى تلقى كل الكون جديد
والسلام عم الأماكن والامان من غير حديد
مهما كان القصر عالى بس أضيق م الوريد
طول مايبقى العدل سارى بالبصاير والعينين
يبقى عارف
لو يخالف
يلقى صوته
راح لفين
✍🏻 طلعت عامر
تعليقات
إرسال تعليق