بقلم // طلعت حلمى عامر
محلاك يا شاى عل الفحم
وانا وانت والراكيه
اشرب وزيح الهم
واجمع شباب الناحيه
واحكى حكاوى زمان
عن فرحة الغيطان
لما يراعيها صاحبها
والزرع فيها يبان
نفض ايديك نفض
وامسح عرق الايام
عل الكوم روح اتنطَّط
تحت الشجر روح نام
امسك فى ايدك فاس
وافتح خطوط وبتون
اعمل حُلَق وبكاس
والله يكون فى العون
وقت العصارى جاى
اقعد فى وسط الجرن
اتغدى واشرب شاى
واعمل لنفسك خُن
ريح ساعه وساعتين
واكسر حرارة الشمس
وامسك بايديك الاثنين
بعد العصارى الفأس
شمس الضحى غابت
روح لِم فى عزالك
وحمارك الثابت
حمِّل عليه حمالك
فلاحنا من يومه
الخير مع قدومه
قال واحنا بنلومه
واحنا أخرنا كلام
فلاحنا مش طماع
طرحه ولو ينباع
بيسد حق الزرع
قوانين ومش شايفاه
رغم الزراعه حضاره
وناس كتير حسداه
على خيره جوه فى داره
محلاك ياشاى عل الفحم
وسط الغيطان والزرع
°• طلعت عامر •°
تعليقات
إرسال تعليق