علمتنى الحياااااة بقلم ناديه سعدالدين/ وطني نيوز

 

بقلم / نادية سعد الدين محمد 

الحياة علمتنى ان الكداب شكاك و دايماً بيشوف كل الناس كدابين زيه .. والخاين بيشوف كل الناس خاينين زيه وإن الطيب مابيتعلمش من غلطه ، لإنه مهما قابل ناس وحشة مش بيستوعب وحاشتهم ، وبيفضل يتوسم الخير فيهم 

علمتنى ان الغلطان هو اول من يشتكي 

علمتنى ان الظالم اكثر ثرثره من المظلوم 

علمتنى ان من القلب للقلب رسول ونفس اللى جواك ليا هو اللى جوايا ليك 

علمتنى اصبر على البلاء ومزعلش من الخساره لان ربنا بيعوض باكتر من اللى خسرته بس باللي هو شايفه أولي !!

علمتنى ان لما حد يغتابنى او يغلط فى حقى أو يتبلى عليا مزعلش منهم لكن أزعل عليهم وان دول ربنا سخرهم لى عشان أخد حسنات وأكتشف بيهم حقيقة ناس مزيفه كتير وقلت الاصل والنداله عندهم موضه 

علمتنى ان السكوت افضل رد على السفهاء 

علمتنى انى مادام ماشي فى الطريق الصح مايهمنيش حد واللى يقول يقول، ربنا بيبين الحقائق فى الوقت الصح 

علمتنى ما اندمش على اى قرار اخدته حتى لو غلط واستحمل نتيجته و اتعلَّم منه 

علمتنى ابقي بوش واحد وكلام واحد ورأى واحد 

علمتنى ابقى قد كلامى و قد وعدى 

علمتنى إن اللى تعمل معاه خير ويقلل منك قدام الناس ده حقير و ناقص و بيجيله اللى يقلل منه ويمشى وراه مذلول !!

علمتنى اسمع بعينى وادور على الحقيقه بنفسي و واتأكد وماحكمش علي حد من اللى بسمعه 

علمتنى اسمع من الطرفين .. لإن فيه ناس أخبث من إنهم يبينوا حقيقتهم .. وفيه ناس وضوحهم بيظلمهم لانهم قلوبهم صافيه ونضيفه 

علمتني ان لو حصل بيني وبينك اي خلاف و زعل و خسرنا بعض و جيت في يوم احتاجتني اركن كل حاجه علي جنب و ماتترددش انك تيجي تكلمني هتلاقيني مستنيك و مرحب بيك لاني دي اصول 

علمتنى إن أصحاب الضمير والقلب الحى نعمة واللى قلبه حجر مايساويش ولو يملك مال قارون وجمال سيدنا يوسف 

علمتنى ان المكسب الوحيد ليا انى ابقي انا زى ما انا عايز اكون مش زى ما اي حد عاوزني أكون 

علمتنى إن أحقر الناس هو اللى يستغل حبك له لفترة ويستغنى عنك فى لحظة عشان مصلحة جديدة  

علمتنى إن عيلتى و الناس اللي ف حياتي ولاد الاصول اللي سند بجد هما أهم إنجاز فى حياتى 

واتعلمت إن اللى بيعمل حاجة فعلاً بتتردله بنفس الطريقة بالمللي 

و اخيراً علمتني ان الخير و جبر الخواطر سحر و السعاده اللي الواحد بيحس بيها بعده لا تقارن ، وإن الحب والوفاء اللى بتقدمه بيرجعلك أضعاف مضاعفة 

وعندما اقول علمتنى الحياة فاكيد دفعت الثمن لان الحياة لا تعطى دروساً مجانية .