تحذير الدكتور محمد علام من خطورة الموجه الثانيه لفيروس كورونا / وطنى نيوز

 

كتب- هانى زكريا

من شهرين قلت ان الموجه الثانيه عالميا هتكون اقوى لكن قوتها مش لان الفيرس هيبقى اقوى لان فى انواع قويه جدا موجوده من بدايه الوباء وللاسف مستمره مختفتش اللى حصل أن فى الصيف معدلات الانتشار قلت والمناعه كانت اقوى ودلوقت الوضع اتغير

لكن قوه الموجه الثانيه هيكون سببها ان الناس هتزهق بسبب طول المده وهتهمل اكتر والانتشار هيزيد فالوفيات هتزيد للاسف الكلام ده حصل وبصوا لارقام دول اوروبا وامريكا هتلاقوا الوضع بيسوء كل يوم عن اليوم اللى قبله

احنا معندناش مناعه خارقه علشان نفكر ان ده مش هيحصل عندنا ممكن مش بنفس الشده لكن هيحصل وناس كتير هتفقد ناس غاليه عليهم بسبب اهمالهم وبعد فتره كل ده هيتنسى وهما مش هيقدرا ينسوا علشان كده كلامى كله كان مع الناس ومازال معاهم لانى مؤمن او الوعى هو الحل

الحقيقه احنا اهملنا والاعداد زادت وطول مالاهمال مستمر والفيرس موجود هيبقى الوضع كل يوم اسوء من اليوم اللى قبله

كان قدامنا فرصه منوصلش للوضع ده لو كنا التزمنا وللاسف محصلش والوضع بقى سئ وسئ جدا

لكن لسه الوضع هيبقى اسوء ولو فضلنا مستمرين هيبقى كارثى وكلنا هنخسر وبالتزامنا من دلوقت نقدر نتخطى الوضع ده باقل الخسائر

حتى لو حصل حظر وإغلاق للمحلات وده اتوقع انه هيحصل قريب جدا هتفضل المشكله من وجهه نظرى قائمه لان الناس بين بعضها مش هتلتزم وهيتجمعوا داخل البيوت والزيارات هتستمر والمناسبات هتتعمل والاختلاط مش هيتوقف وده حصل قبل كده

ارجوكم التزموا روح انسان غاليه جدا وطالما نقدر نمنعها بحاجات بسيطه يبقى واجب علينا نسعى لده بكل قوه

كمامه وتباعد مجتمعى ومسافات حاجات تافهه وفى غيرنا نجح بسببها من الخروج من الموجه الاولى او حتى الثانيه باقل الخسائر واحنا مش اقل منهم ، فوقوا ارجوكم بدل متفوقوا على كارثه داخل بيوتكم ومحدش ساعتها هيعرف يعمل حاجه.

دمتم بخير وأمان بإذن الله دكتور محمد علام