كتب - هانى زكريا
تصحيح لبعض الاخطاء بخصوص الكمامات :
* الكمامه القماش لا تحمى فى حاله عدم ارتداء الجميع لكمامات.
* الفيس شيلد لا يحمى نهائيا وغير موصى به وممكن فقط للاشخاص اللى مش هيقدرا يلبسوا كمامه ومضطرين للخروج زى الاطفال ذوى الاحتياجات الخاصه او اصحاب الامراض المزمنه فى الصدر والحساسية مش منهم ومطلوب من الجميع يرتدى كمامه وهو بيتعامل معاهم كده هما فى أمان الى حد ما.
* الكمامه الهدف الرئيسي منه منع خروج الرذاذ من الشخص المصاب فلو شخص مصاب مش لابس كمامه وفى مكان مغلق مع شخص سليم لابس كمامه فالسليم معرض للخطر لان فاعليه الكمامه مش 100٪ وكمان فى مدخل تانى وهو العين مكشوف فلازم مسافه متر ومكان غير مغلق ووقت التعامل يكون قليل والكل يلبس كمامه
* الكمامه بفتحه تهويه مضره مش ليك لكن مضره للمحيطين لان وظيفه الفتحه دى تسهيل خروج الرذاذ وبيخرج بدون فلتره فانت لو مصاب ومتعرفش عرضت اللى حواليك لخطر الرذاذ (وحسب اخر تحديث لمنظمة الصحة العالمية انه مينفعش نهائى)
* الماسكات مش بتزود نسبه ثانى اكسيد الكربون ولا بتعمل مشاكل فى الرئه فقط لو الكمامه استعملت لفتره طويله بتفقد فاعليتها ولو بقت مبلوله بيبقى صعب التنفس منها فلازم تتغير خصوصا لو جراحيه
* فى مدخل مهم للعدوى وهو العين مينفعش نغغله يعنى متلبسش ماسك وتدخل مكان مغلق سئ التهويه ومفكرين اننا فى أمان لان الرذاذ بيكون معلق لوقت طويل فى الاماكن سيئه التهويه وهيلاقى مدخل مفتوح وهو العين فاحتمال تتصاب.
* الشخص المعارض لارتداء الكمامات رجاءا بطل تنشر اخبار غلط عن خطر الكمامات او ان الموضوع مش حقيقى وتنقل بوستات مواقع واشخاص معموله تبع حركه فى امريكا وأوروبا معارضه للاجراءات الاحترازيه والكمامات لانك كده بتضر بغيرك مش مقتنع انت حر فى تصرفك لكن متأذيش غيرك بنقل كلام غلط ونتيجه الحركه دى بنشوفها فى زياده عدد الحالات والوفيات فى امريكا وأوروبا (بالامس امريكا سجلت رقم قياسى اول مره تسجله وهو 3 الاف حاله وفاه فى يوم واحد وطبعا كلنا شايفين الوضع فى اوروبا ) فارجوك كفايه
* بعض الخطوات لازم يكونوا مع بعض لان حاجه منهم لوحدها مش كفايه ولو طبقتهم هتكون فى أمان ان شاء الله
ارتداء الكمامه - مسافه متر - مكان جيد التهويه - تقليل الوقت فى اى مكان به تجمع بشرى وعدم تقريب الايدى من الوجه.
دمتم بأمان بإذن الله دكتور محمد علام 
تعليقات
إرسال تعليق