كتب - هانى زكريا
انا بكره الشتاء او انا بكتئب فى الشتاء كلام حد من اصحابك بيقولهالك وبنتريق عليهم ومبنصدقش ان فى حد بيكره الجو الجميل ده .
علميا فى حاجه اسمها Seasonal affective disorder (SAD) يعنى الاضطرابات العاطفيه الموسميه يعنى الشخص ده مش بيهزر
تعريفه : هو نوع من الاكتئاب المرتبط بالتغيرات الموسمية يعنى بيبدأ الاضطراب العاطفي الموسمي وينتهي في نفس الأوقات من كل عام مثلا مع بدايه فصل الشتاء ونهايته
اعراض الحاله دى بتختلف من شخص لشخص فتجاهلها شئ غلط خصوصا لو بدئت تأثر على حياتنا وانشطتنا والاعراض دى منها :
- الشعور بالاكتئاب معظم اليوم في أغلب الأيام
- فقد الاهتمام بأنشطة كنت تستمتع بها سابقًا
- انخفاض النشاط والشعور بالخمول
- وجود مشكلات تتعلق بالنوم (زياده فترات النوم او الارق)
- الشعور بتغيرات في الشهية أو الوزن
- صعوبة التركيز
- الشعور باليأس أو فقدان الأمل أو الذنب
- تردد أفكار حول الموت أو الانتحار ودى اخطر حاجه
امتى تكون محتاج لزياره طبيب ؟؟
ده اهم سؤال ، من الطبيعى ان الشخص يحس بالتعب فى بعض الايام لكن لو الموضوع مستمر وبدء يأثر على حياته يعنى بقى عنده عدم رغبه فى ممارسه انشطته العاديه زى المذاكره او العمل وبدئت تحصل تغيرات فى الشهيه وزياده الوزن او بدء يعانى من الارق او بينام لفترات طويله والموضوع متكرر سنويا فى نفس الوقت يبقى لازم يتابع مع طبيب امراض نفسيه الموضوع عادى ومفيهوش حاجه تكسف
طبعا اخطر حاجه واهمها لو بدء يفقد الامل فى حياته ويفكر فى الانتحار هنا لازم يدور على المساعده وواجبنا منتفهش من المشكله لان اكثر حالات الانتحار اللى بتحصل بسبب الاكتئاب سببها ان مفيش حد بيسمع او بيساعد الشخص وبيجاهلوا مشاعره وشكوته.
سبب الاضطرابات العاطفيه الموسميه او اكتئاب الشتاء او الاكتئاب الموسمى ايه ؟؟
السبب مش معروف لكن فى نظريات لتفسير الحاله دى
1- عدم التعرض للشمس بسبب قصر فتره النهار ووجود الغيوم ده بيأثر على الساعه البيولوجيه لجسم الانسان
2- انخفاض مستوى السيروتونين نتيجه انخفاض التعرض للشمس قد يكون ليه دور فى الحاله دى
3- يمكن لتغير الفضول تغير مستويات الميلاتونين فى جسم الانسان وهو هرمون هام لتنظيم ساعات النوم والاكل والمزاج
علاج الاكتئاب الموسمى او الاضطرابات العاطفيه الموسميه ؟؟
العلاج بيعتمد على الحاله يعنى لو بسيطه او متوسطه او شديده والعلاجات بتشمل
علاج دوائى - علاج نفسي -العلاج الضوئى وهوالتعرض للشمس او لضوء قوى لفترات يوميا
عوامل الخطوره ومضاعفات الاضطرابات العاطفيه الموسميه ؟؟
فى الاشخاص اللى عندهم اكتئاب شديد لو اضطراب ثنائى القطب لو حصلهم الحاله دى بيكون الاعراض اشد والناس اللى عندهم تاريخ عائلى لحالات مشابهه عرضه اكتر او الاشخاص اللى متعودين على حياه قريبه من خط الاستواء وانتقلوا لاماكن بعيده عن خط الاستواء بيكونوا عرضه اكتر
المضاعفات بتكون بسيطه لشديده
العزله الإجتماعيه
مشاكل فى العمل او الدراسه
تعاطى المخدرات او الكحوليات لتحسين الحاله النفسيه
والاسوء طبعا فقدان الامل والتفكير فى الانتحار
بعدنا عن الكورونا شويه لو لقيت واحد صاحبه بيقولك بكتئب فى الشتاء متتريقش عليه لان دى حاجه حقيقيه
دكتور محمد علام
تعليقات
إرسال تعليق