ببساطه ... بقلم شيرين سليمان / وطنى نيوز

بقلم شيرين سليمان

ببساطه لازم تتقبل فكرة الإختلاف أينعم زي ما بقول كدا
إن غيرك يختلف معاك فى الرأي
كل واحد فيكم ليه وجهة نظر ، رأي فى موضوع معين شخص معين ، مهنه معينه .
فيها ايه لو سمعتها وإحترمتها من غير ماتخسر اللى قدامك
الكوكب هيختل ميزانه مثلاً لو بطلت تجادل لمجرد انك مقتنع برأيك وعايز تفرضه على غيرك .
فيه حاجات بتضيع وقتك فيها على الفاضي.
بتحرق جاز على الأرض وتهلك طاقتك .
الحياه أبسط من إنك تضيعها فى النقد أو التذمر من اللى حواليك بس علشان إختلفت معهم.
تحس فى أيامنا كله بقى ماشي مش طايق غيره لمجرد إنهم متفقوش فى الرأي معاه
إذا كان الناس يا عزيزي متفقوش فى عبادة ربنا الواحد الأحد يبقى بتدور على إتفاقهم فى حاجه واحده طب إزاي؟!!
فيه قاعده فى الفقه بتقول إن إختلاف الأئمه رحمه
أو بمعنى أدق اختلاف الأئمه فى موضوع فقهي معين بغض النظر عن هو ايه رحمه بالناس .
علشان تسهل عليهم حياتهم وانت بقى وإختيارك عايز تسهل على نفسك بتاخد الأيسر معقد الدنيا بتدور على المذهب الأصعب فتقبل رأي غيرك وبلاش شغل ام العريف وكأنك فاهم كل حاجه وأي حاجه واللى يسألك تجود وتزود شوية تحابيش من عندك المهم تظهر للي قدامك بمظهر السوبر هيرو اللى مفيش حاجه بتخفى عليه ، وكأنك خطيب عصرك وأوانك ودورك فى الحياه أنك تقنع غيرك برأيك أصل هو الصح بقى غير كدا تبقى نظرتك لغيرك بقرف وتحدي
يااي مختلف معايا ، إنسان همجي مش بيفهم.
ياريت كل واحد يركز فى حاله ويحترم وجهة نظر غيره لأن ده من مصلحتنا . فى إختلافنا حياه مختلفه متنوعه مش بنظام السيستم الواحد .فيا سيدي تعالى على نفسك وخلي فيه شوية أوبشنز .