بقلم الإعلامي/ يوحنا عزمي
ايه الفستان اللي انتي لابساه ده... وازاي الناس تشوف ولو حته صغيره من جسمك.. ؟ جسمك ده ملكي انا بس ومش بحب حد يشوفه غيري..
مفيش خروج ولا اصحاب ولا اي حاجة غير معايا... انتي ملكي و بس..
الكلام ده مشابه جداً زي لما بيكون عندك حاجة غالية قوي، غالبا بتحاول تخبيها و تشيلها علشان ماحدش يشوفها ومش بتطلعها غير في مناسبات معينة بس..
طيب سؤال؛ ليه جايب حاجة غاليه و حابسها في مكان ضلمة طالما انت مش ها تخليها تشوف النور.. ؟
ده اللي احنا كتير بنعمله في علاقاتنا بأساليب منها الكلام اللي بيدل علي (الامتلاك) اللي بتكراره بيحصل نوع من الـ Neuro Language programming او البرمجة اللغوية العصبية للأثنين انهم بتوع بعض وبس، ومن هنا وبسبب الحاجات دي بيبدأ الراجل يخبي البنت في حته ضلمة
ومحدش يشوفها ولا يكلمها غيره بحجة حبه ليها وانها ملكه هو بس..
وهنا غالباً بيحصل حاجتين اساسيتين..!!
الاولي ان البنت بتطفي لان صحتها النفسية محتاجة هوا
ومياه علشان تفضل تتنفس و الهوا هنا هو علاقاتها باللي حواليها اللي بتخلي وشها منور زي علاقتها بأصحابها
وخروجاتها وممارستها لهوايات وانشطة هي بتحبها وخطورة الحبس و المنع من كل حاجه انه بيخليها تدخل في حالة Anexiety او قلق مرضي من فقد الطرف التاني لانه اصبح هو مصدر الاشباع بالنسبالها في كل حاجة وهو بس التعويض الموجود عن كل علاقاتها واللي تم اختصارها في حته ضلمة صغيره من الكوكب مفيش فيها غير الطرف التاني اللي معاها بس، و اللي لو فقدته - لأي سبب - ها تخسر كل حاجة في حياتها.
الحاجة الثانية هي ان نوع العلاقة دي بتكون unhealthy relation او علاقة غير صحية وده لانها بتبقي مقفولة علي طرفين وبس ... خطورة العلاقات اللي من النوع ده انها بتستهلك الطرفين نفسياً لان (شعبطة) كل طرف بالتاني بتحولها لعلاقة اعتمادية من الدرجة الأولى ، و كل واحد منهم بيعتمد علي الطرف التاني في اشباع رغباته ، غير ان (اللزقة) دي بتخنق الطرفين لانها بتقتل اي مساحة للحرية سواء للأثنين - لو متشعبطين في بعض - او للطرف الاضعف وهو البنت اللي متشعبطة في راجلها ، وبكده تبدأ تطفي
وتذبل لحد لما تموت.. !
الحل ايه طيب.. ؟
الحل اننا نؤمن بمساحة الحرية لكل طرف وما نلزقش في بعض ، اننا نسيب لبعض مساحات لانه ".. لا حب دون حرية" والاهم هو ان كل طرف يساعد التاني انه يفضل منور ومايحبسوش في حته ضلمة وباردة.
تعليقات
إرسال تعليق