مخاوف بعض الناس من موضوع تحويل العربيات للعمل بالغاز_الطبيعي / وطنى نيوز

متابعة محمد شومان

خصوصاً بعد ماالموضوع دخل في الجد بعد ماقام النهاردة الرئيس_السيسي بتفقد نماذج لسيارات تم تحويلها للعمل بالغاز الطبيعي ،وده خلي الناس اللي كانت قلقانة من الموضوع يزيد قلقها لأن الرئيس معروف أنه لما بياخد قرار بينفذه ومش بيتراجع فيه ،
أول حاجة لازم تعرفها وقبل الدخول في تفاصيل فنية إن تحويل السيارات للعمل بالغاز الطبيعي له جانب إقتصادي خاص بيك وجانب إقتصادي خاص بالدولة ،
- الجانب الإقتصادي الخاص بيك إنك هتقوم بتوفير مبلغ كبير في كل تفويلة، لان تفويلة الغاز سعرها حوالي 50 جنية في حين تفويلة البنزين بحوالي 300 جنيه علي أقل تقدير، وده هيوفرلك مبلغ كبير شهرياً ممكن تقوم بتوجيهه في أي جانب تاني في حياتك أو بيتك .
- أما الجانب الإقتصادي الخاص بالدولة فطبعاً كلنا عارفين إن البلد في الفترة الأخيرة بعد ماقامت بترسيم حدودها البحرية ونتج عنها إكتشافات ضخمة من حقول الغاز حققنا منها الإكتفاء الذاتي من الغاز وبنقوم كمان بالتصدير ، لكن مازال عندنا كميات كبيرة بيتم إنتاجها وهتزيد أكتر الفترة اللي جاية مع زيادة الإكتشافات ،
وعلي الجانب التاني إحنا مازلنا بنقوم بإستيراد البترول بمليارات الدولارات سنوياً وفي 2019 بس مصر إستوردت ب 6.8 مليار دولار وقود ،
فلو تم تحويل السيارات للعمل بالغاز الطبيعي المتوفر عندنا بكميات كبيرة هنوفر المليارات دي من العملة الصعبه اللي بنستورد بيها الوقود سنوياً وده هينعكس علي إقتصاد الدولة وخصوصاً سعر الدولار اللي قيمته هتنخفض بسبب قلة الطلب عليه .
ثانياً هينعكس برضه عليك إنت لأن المبالغ الضخمه اللي الدولة بتستورد بيها وقود سنوياً هيتم توجيهها لمشروعات تنموية وطرق وكباري ومدن جديدة وبنية تحتية ، بالإضافة طبعاً إن لما هينخفض سعر الدولار ده هيساعد علي إنخفاض أسعار جميع السلع وكل ده إنت أول واحد هتستفيد منه وهينعكس علي حياتك اليومية .
نيجي بقي للجزئية الفنية في الموضوع ودي مش هتكلم فيها كتير ولاهدخل في تفاصيل معقده لأني غير متخصص ، بس كل اللي لازم تعرفه إن أنظمة الغاز في العربيات دلوقتي حصل فيه تطور كبير عن زمان وأحدث الأنظمة دي هو نظام #الحقن_المتزامن أو "الحقن الإلكتروني للغاز" وده النظام اللي هيتم إستخدامة وده غير نظام الغاز اللي كان موجود في السابق ومش بيسبب أي مشاكل لموتور العربية نهائياً زي ماكنت بتسمع زمان لسببين :-
السبب الأول إن ده نظام حديث شغال في دول كتير في العالم بدون مشاكل وشغال في مصر من حوالي 3 سنين خصوصاً في سيارات الأجرة الحديثة ومحدش إشتكي منه نهائي أو قال أنه إتسبب في تلف موتور عربيته .
السبب التاني إن مواتير السيارات دلوقتي مجهزة للعمل بالغاز الطبيعي بدون أي ضرر من خلال إنها مصممة تكون مقاومة للتآكل وبالتالي الغاز الطبيعي مش هيسبب أي ضرر لها بعكس مواتير السيارات القديمة اللي كانت مش بتتحمل الغاز لان مواتيرها مكانتش مصممة لتركيب نظام الغاز وكانت أجزاءها معرضة للتأكل، غير إن نظام الغاز القديم مختلف تماماً وبيسبب ضرر للموتور بعكس نظام الحقن المتزامن للغاز الموجود دلوقتي .
بالإضافة أن النظام الحديث بيسمحلك إنك تحول عربيتك من غاز لبنزين أو العكس بمجرد ضغطة علي مفتاح التحويل اللي هيبقي موجود داخل عربيتك بمنتهي السهولة فلو محتاج سرعة وعزم أكتر ممكن بضغطة واحدة تحولها علي نظام العمل بالبنزين .
طيب هل في عربيات مش هينفع إنها تتحول للعمل بالغاز الطبيعي ؟
أكيد طبعاً وخصوصاً العربيات الحديثة اللي محركاتها مزودة بتيربو لأن نسبة إنضغاط محركاتها عاليه والغاز مش هيبقي مناسب لها علشان كدة هتتشكل لجنة فنية والعربيات اللي مش هينفع تتحول لغاز مش هيتم تحويلها وهتفضل زي ماهي تعمل بالبنزين للحفاظ عليها .