الاحلام ...كتب:- محمد السيد زمزم / وطنى نيوز

كتب المهندس :- محمد السيد زمزم
 
الأحلام: نقدر نقول انها سلسلة من الصور والانفعالات الي بتحصل للإنسان أثناء نومه وتعتبر تنفيس عن رغبات الإنسان ..
ولحد اللحظة دي مفيش تفسير أو سبب علي اننا ليه بنحلم أو ازاي بتتكون الأحلام، وازاي ممكن يحصل ان بعض الاحلام ممكن تتحقق؟؟.
اهتمام الإنسان بالأحلام بدأ من الربع الأول من القرن العشرين لما أصدر العالم "فرويد" كتابة (تفسير الاحلام) وقال إن الاحلام مجرد تنفيس لرغباتنا المكبوتة، فرد العلماء عليه وقالوا إنها عبارة عن موروثات جينية متراكمة يعني ممكن الاحلام الي انت بتحلم بيها دي يكون أجدادك حلموا بيها بنفس التفاصيل!!
أما من ناحية تفسير الاحلام فاشتهر المبدع (ابن سيرين) بتأويله لتفسير الاحلام وكانت تفسيراته بتصيب بنسبة كبيرة جدا، وحصل موقف جميل مع (ابن سيرين) لما جاله واحد عايز يفسر حلم قاله "أنه شاف عصفورة ولما جه يدبحها العصفورة اتكلمت وقالتله متدبحنيش"!!
(ابن سيرين) قاله استغفر ربك!! فتفسير الحلم ده انك اخدت صدقه مش حلال ليك!!
طبعا الرجل اندهش واعترف أنه اخد صدقة متحلش ليه..
لو هندور في سيرة (ابن سيرين) هتلاقي حكايات غريبة جدا منها، قبل وفاته بأيام قليلة كان قاعد مع اخته، جاتله ست وطلبت منه تفسير رؤيه شافتها ليه ولما أخبرته بالرؤيه، استغرب جدا ولون وجهه اتغير، سألته أخته اي معني كلام الست دي، قالها تفسير حلمها اني هموت بعد سبعة أيام!!
وفعلا (ابن سيرين) مات وادفن في اليوم السابع!!
طبعا موت (ابن سيرين) قدر من ربنا لكن فيه شئ غريب واكيد الاحلام فيها رسائل للإنسان ساعات مش بياخد باله منها..
ويمكن من الأمور الي فيها طرافة وغرابة الي حصلت سنة 1883، لما الصحفي "إدوارد سامسون" نام في مكتبة من الارهاق وشاف حلم غريب وصحي مفزوع من النوم بسبب حلم غريب شافه، شاف فيه مجموعة كبيرة من الناس بيحاولوا يهربوا من بركان ثائر ، ومجموعة كبيرة من السفن محطمة، والغريب أن الشمس كان لونها ازرق!!
طبعا تأثر جدا بتفاصيل الحلم لدرجة إنه كتب تفاصيل الحلم علي ورقة عشان مينساش الحلم وساب الورقة علي مكتبه وروح بيته..
تاني يوم محرر الجريدة دخل مكتب "سامسون" وافتكر أن قصة البركان دي حقيقية، فعاد صياغتها ونشرها في الجريدة ولما عرف "سامسون" بالي حصل اعتذر لرئيس الجريدة وقاله دا مجرد حلم ، لكن الغريب إن بعد يومين من نشر الخبر، جات اخبار أن جزيرة "كاراكاتوا" ثار فيها بركان كبير تسبب في موت اكتر من 36 ألف شخص، وغرقت بسببه سفن كتير، وإن الشمس بقي لونها ازرق بسبب الأبخرة والغازات والرماد البركاني!! يعني زي ما حلم بالظبط،والي خلي الناس تندهش أنها قرأت الخبر قبل ما يحصل بيومين وبكل تفاصيلة كمان!! وأنها بس مجرد رؤيه..
وتعالي احكيلك عن شوية معلومات هتدهشك بخصوص الاحلام..
الإنسان بيحلم من 5 الي7 احلام في الليلة الواحده، ولما بتصحي بتكون ناسي اكتر من 80% منها وبتاخد اول خمس دقايق من استيقاظك بتحاول تفتكر انت حلمت بإيه.
.
نفترض انك نمت الساعة 10الليل، دماغك مش هتقدر تعرف الوقت يعني لو حلمت 5 احلام في الليلة الواحده هتشوف كل مرة وقت مختلف تماما عن الوقت الي نمت فيه
هقولك علي حاجه هطمن قلبك شوية، لما مثلا بتكون بتحلم بحلم حلو وشادك جدا زي مثلا انك هتتجوز الكراش وفجأة صحيت وعايز تكمل الحلم حاول انك متحركش اي عضو من جسمك ونام بنفس الوضعيه الي كنت عليها وغمض عينيك وهترجع لحملك تاني..
يعني مثلا ممكن احلامك تخليك تستلهم افكار للاختراعات تغير مثار البشرية زي "الياس هوي" مخترع الة الخياطه الي استلم فكرتها من أحدي كوابيسه، كان بيحاول الهرب من اكلي لحوم البشر كانوا حاميلن رماحا فقال الرماح دي هي إبرة الخياطه
لو حد قالي ازاي الكفيف بيحلم؟
الكفيف بيمكنه الحلم زينا مع أنه مش بيشوف احداث حصلت معاه بس معظم أحلامه بتعتمد علي باقي حواسه وعواطفه
معظم الناس الي بيحلموا بالجنس وده أمر طبيعي لأي شخص، فالجنس من الحاجات الضرورية والمطلوبة في حياة اي إنسان وعشان كده الاحلام تُعتبر وسيلة للتنفيس عن رغباتنا ومش معني انك بتحلم بالجنس يبقي انت كدا شهواني أو مريض مثلاً..
علي الرغم من أن الحيوانات مش بتمتلك القدرة علي التفكير زي البشر أو التنفيس عن رغباتها وكمان نومها بسيط ومش عميق لكن بعض الدراسات أثبتت قدرة الحيوانات علي انها بتحلم..
طبعاً معظمنا مدرك بأن المصريين القدماء مفيش حاجه معملوهاش ومفيش مجال مكتبوش عنه فعلماء المصريات اكتشفوا كتاب بيتكلم عن الاحلام وبيرجع تاريخه لحوالي ٥٠٠٠ ق.م
وفقاً لنتايج فحص تمت علي حوالي ٣٠٠٠ شخص أظهرت أن التحكم في الاحلام شئ ممكن يحصل وكان حوالي ١٠٢٠ شخص من المشاركين قدروا يتحكموا في احلامهم وقالوا العلماء أنها مهارة مش عند كل الناس بس بالتدريبات الذهنية ممكن تمتلكها..
اهم نقطة بقا في موضوعنا هي أن اكتر الاحلام انتشار بينا كبشر واكيد حصلت معاكم كتير زي السقوط من مكان عالي أو الطيران أو أن اسنانك بتقع أو أن حد بيجري وراك..
وكمان لو اتكلمت في الحلم صوتك هيخرج فعلا في الحقيقة..
بيعتقد الكثير من العلماء أن الاحلام هي رسائل عقلية غامضة بتيجي من المستقبل بصورة غريبة، إلا أن الروحانيين معجبهمش كلام العلماء وقالوا إن الروح بترتقي بطريقة ما ويمكنها الاتصال بعوالم تانيه وتقدر أنها تقابل الموتي!!
وان الموتي بتجبلنا رسايل بترتبط بحياتنا الخاصة!!
وفي النهاية هتفضل الاحلام هي الجزء الي بنرفه بيه عن نفسنا من ضغوط الشغل أو المذاكرة أو التعب وفي احلام كتير جدا ملهاش اي تفسير حصلت معانا ولسه هتحصل .