سد النهضة.. مابين الحرب والمفاوضات الفاشلة / وطنى نيوز

بقلم الكاتب/ يوحنا عزمي

مصر قررت إنها تتوجه بشكوى رسمية لمجلس الأمن التابع للأمم المتحدة United Nations Security Council، عشان تدعوهم للتدخل وإيقاف إثيوبيا من اتخاذ أي قرار فردي بملء سد النهضة، لإن القرار ده حسب كلام سامح شكري وزير الخارجية، هيأثر على أمن مصر القومي، وسلام واستقرار المنطقة بأكملها..
لو مش فاهمين ده معناه ايه، هشرحلكم بالراحة..
بعد كل المفاوضات اللي فشلت دي كلها، وبرغم إن أثيوبيا من حوالي شهر كده قالتلنا نروح نخبط دماغنا ف الحيطة أو نشرب من البحر (حرفيًا) عشان هما هيبدأوا يملوا السد في شهر يوليو ، بدون أي اتفاقيات مع أي حد.. مصر والسودان قرروا انهم يدخلوا في محادثات رسمية تاني مع أثيوبيا من أربع أيام كده، والمحادثات دي خلصت بردو بدون أي اتفاق..
طب ده معناه إيه؟!
معناه إن الحكومة المصرية بتحاول بكل الطرق (السلمية) إنها تخلي أثيوبيا تتراجع عن قرارها الفردي بملء السد بدون اتفاقية مع مصر.. وده كان من خلال محادثات ومباحثات سياسية ودبلوماسية كلها فشلت بسبب تعنت الجانب الإثيوبي، وإصراره على المماطلة..
طب كون إن مصر خلاص هتتوجه لمجلس الأمن رسميًا ده معناه إيه؟!
معناه إنك تبتدي تقلق جدًا حضرتك.. عشان حسب قواعد السياسة العالمية والأزمات الدبلوماسية الكبرى، لجوء واحدة من الدول المتنازعة لمجلس الأمن والأمم المتحدة رسميًا، بيكون بسبب إن مجلس الأمن عنده السلطة إنه يأمر الدولة المعتدية على حق الدولة اللي مقدمة الشكوى، بإنها توقف تعاملاتها أو مشاريعها اللي هتضر الدولة التانية دي.. والأمر ده في الطبيعي بيكون أدبي يعني مش إلزامي.. بس في حالة إنهم لو شافوا إن الموقف فيه تهديد للسلام ولأمن المنطقة، بيكون القرار إلزامي ولازم يتنفذ وإلا هيتم توقيع عقوبات وممكن توصل لحد القوة الرادعة لو الأمر متنفذش..
فبالتالي لو مجلس الأمن عمل ده؟!!.. يبقى خير وبركة، وهنقدر نكمل المباحثات بشكل محترم ولائق..
طب لو ده محصلش، وإثيوبيا نجحت في محاولاتها لتضييع الوقت، وبدأت في عملية ملء السد قبل ما ييجي أي قرار من مجلس الأمن؟!.. أو لو مجلس الأمن أصلًا رفض؟!
كده هتكون الخطوة التالية علطول هي الحرب.. مفيش أوبشن تاني..
وده بجد مش هزار.. إحنا في الأسابيع القادمة أقرب للحرب الحقيقية مع دولة إثيوبيا، أكتر من أي مرة في تاريخ مصر الحديث من ساعة حرب أكتوبر ١٩٧٣..
وأثيوبيا مش فارق معاها.. وبيقولوا إن جيشهم: "مستعد للتصدي لأي خطر وحماية سد النهضة"..
مثلًا عندك هاني رسلان رئيس وحدة السودان وحوض النيل بمركز الأهرام اللي قال إن هناك احتمال للجوء مصر إلى السلاح في قضية سد النهضة.. وقال في تصريح لموقع "الحرة" إن:
-"مصر أكدت أنها ستستخدم جميع الوسائل للدفاع عن حقوقها في مياه النيل، ومنه الحل العسكري، بما معناه إن موقف القاهرة الرسمي لم يستبعد الحل العسكري."
كمان الدكتور أيمن شبانة، مدير مركز البحوث الأفريقية بجامعة القاهرة، قال رسميًا لموقع "الحرة" بردو إن:
-"إقدام أديس أبابا على ملء السد هو بمثابة إعلان الحرب على مصر لأنه سبب في تهديد حياة المصريين."
طب ده كله معناه إيه؟!!.. لسه مش فاهمين؟!!
مصر على شفا الحرب يا سادة.. مش وقت فرقة ولا جدال ولا خلافات ولا خناقات.. كلنا ولاد وطن واحد.. أفيقوا وأنبذوا خلافاتكم، وركزوا مع الخطر اللي بيقرب مننا كلنا.. عشان لو مشروع سد النهضة اتنفذ، ف العطش مش هيفرق ما بين خير ولا شر، ولا مسلم أو مسيحي، ولا غني أو فقير.