أنتى و انا ... بقلم الشاعر: مصطفى تيسر / وطبى نيوز

الشاعر/ مصطفى تيسر

نفس المكان و انتي و انا
و البحر و الليل و الغنا
لسه الضفاير فوق كتافك مفرودين
لسه الطريق حاضن قلوبنا المشتاقين
لسه الدموع بتبوسنا من الخد اليمين
لسه الحنين بيشدنا لنفس المكان
انتي و انا
قلب إتخطف من نظره من بنت الجيران
و ماعدش باقي في عمرنا انتي و انا
حبه سنين ..
و نقول لمين ؟
يسمعنا مين ؟
نفس الميعاد وقت القا
فرحة قلوب متشوقه
طب لسه فاضل إيه بقى
لمسه إدين ؟
ما يهمنيش الشعر شاب
ما دمنا قلبين فرحنين
مايهمنيش لوم او عتاب
ما يهمنيش غير كلمة تجمع قلبنا
انتي و انا
قلبين و وردة بين كتاب
حرفين و سهم و ليل عذاب
مليون سؤال من غير جواب
و ليل طويل مع حزن داب
بنت الجيران .. بيتها القديم
تسجيل شرايط عب حليم
بتشدني .. بتهدني .. بتهزني
رعشه إيديها البردانين
رقصة قلوبنا الدفيانين
وقت الشتا في لحظة مطر
و الضحك مع أصعب خبر
أنوار تزين حينا
و عريس بيخطف حلمنا
و دموع تغرق حضننا
و الدبلتين ..
صرخه ألم مع نظرتين
كان الوداع في كلمتين
في يوم هنتقابل هنا
إنتي وانا